Jizzaxda erkak 4 mln alimentni tangada to‘ladi
U shu orqali ayolini qiyin ahvolga tushirmoqchi bo‘lgan.
Jizzax viloyatining Sharof Rashidov tumanida aliment qarzdorligi bo‘yicha noodatiy holat qayd etildi. Majburiy ijro byurosi maʼlumotiga ko‘ra, bir fuqaro 4 million so‘m miqdoridagi aliment qarzini to‘lash uchun ushbu mablag‘ni mayda tangalar — 10, 50, 100 va 500 so‘mlik pullarda to‘lashga harakat qilgan.
Maʼlumotlarga ko‘ra, fuqaro L.M. sobiq turmush o‘rtog‘i O.L. foydasiga farzandini taʼminlash maqsadida sud qarori asosida aliment to‘lashi lozim edi. Biroq u belgilangan majburiyatni bajarmasdan, katta miqdorda qarzdor bo‘lib qolgan.
Qonun talablarini anglagan holda, ota alimentni to‘lashga rozilik bildirgan, ammo u bu orqali sobiq turmush o‘rtog‘ini qiyin ahvolga solishni maqsad qilganini taʼkidlagan. U 4 million so‘mlik mablag‘ni mayda tangalarga aylantirib, shaxsan olib borib topshirish niyatida bo‘lgan va shu orqali aliment oluvchi ayolning vaqtini tangalarni sanashga sarflashini istagan.
Biroq tangalar bank xodimlari bilan birgalikda sanab chiqilib, ular aliment oluvchi onaning bank kartasiga o‘tkazib berilgan.
