Shri-Lankada avtobus jarlikka qulab tushdi
Fojia oqibatida 21 kishi halok bo‘lgan.
Shri-Lankada yirik yo‘l-transport hodisasi yuz berdi. Mamlakat janubida harakatlanib ketayotgan yo‘lovchi avtobusi taxminan 100 metr balandlikdagi qoyadan pastga qulab tushdi. Voqea oqibatida kamida 21 kishi halok bo‘lgan, yana 35 nafardan ortiq yo‘lovchi turli darajadagi tan jarohatlari bilan shifoxonaga yotqizilgan.
Voqea sodir bo‘lgan hududda qutqaruvchilar, politsiya va tibbiyot brigadalari ishlamoqda. Halok bo‘lganlar orasida ayollar va bolalar borligi aytilmoqda, biroq marhumlar shaxsiga aniqlik kiritilmagan.
Mahalliy hokimiyat hodisa sabablari o‘rganilayotganini bildirgan. Dastlabki taxminlarga ko‘ra, avtobus haydovchisi yo‘lning og‘ir relyefi va ehtimol, texnik nosozlik sabab boshqaruvni yo‘qotgan.
Shri-Lanka rasmiylari bu fojiani so‘nggi yillardagi eng og‘ir yo‘l-transport halokatlaridan biri deb atamoqda.
