Xitoy O‘zbekiston fuqarolari uchun vizani bekor qildi
1-iyundan O‘zbekiston fuqarolari Xitoyga vizasiz bora oladi.
2025-yil 1-iyundan boshlab O‘zbekiston fuqarolari Xitoyga vizasiz safar qilish imkoniyatiga ega bo‘ladilar. Bu haqda O‘zbekiston Tashqi ishlar vazirligi xabar berdi.
Rasmiy ma’lumotga ko‘ra, O‘zbekiston va Xitoy o‘rtasida o‘zaro vizasiz rejimni joriy etuvchi hukumatlararo bitim kuchga kirgan. Endilikda O‘zbekiston fuqarolari Xitoy hududiga vizasiz kirib borishlari, chiqishlari yoki tranzit orqali o‘tishlari mumkin bo‘ladi.
Muhim shartlar quyidagicha:
- Har bir safar 30 kundan oshmasligi,
- Har qanday 180 kunlik davrda Xitoyda umumiy bo‘lish muddati 90 kundan oshmasligi lozim.
- Agar fuqarolar 30 kundan ortiq qolmoqchi bo‘lsa, oldindan viza olishlari talab etiladi.
Bu vizasiz rejim mehnat faoliyati, o‘qish, jurnalistika yoki boshqa ruxsat talab qilinadigan faoliyat turlari uchun amal qilmaydi.
Shuningdek, ushbu bitim Xitoyning Gonkong va Makao maxsus ma’muriy hududlariga nisbatan tatbiq etilmaydi.
