Bu yil “So‘nggi qo‘ng‘iroq” tadbirlari 24-may o‘tkaziladi
Vazirlik bu bo‘yicha rasmiy axborot eʼlon qildi.
Ijtimoiy tarmoqlarda “So‘nggi qo‘ng‘iroq” tadbiri o‘tkazilishi taqiqlangani, cheklovlar o‘rnatilgani haqida turli xabarlar tarqalmoqda. Holatga Maktabgacha va maktab taʼlimi vazirligi rasmiy munosabat bildirdi.
Qayd etilishicha, joriy o‘quv yilining oxirgi kuni 25 may, yakshanba – dam olish kuniga to‘g‘ri kelganligi sabab “So‘nggi qo‘ng‘iroq” tadbirlari 24 may – shanba kuni o‘tkazilishi belgilangan.
“Vazirlik shuni maʼlum qiladiki, maktablarimizda so‘nggi qo‘ng‘iroq tadbirlarini ko‘tarinki kayfiyatda, tantanalar bilan o‘tkazish anʼanasi bu yil ham davom etadi”, deyiladi xabarda.
Maktabgacha va maktab taʼlimi vazirligi maktablar jamoalarini, bitiruvchilarni, ota-onalarni tadbirlar jarayonida xavfsizlik qoidalariga rioya etishga chaqirdi.
