“Durdona” folklor ansambli: milliy madaniyatimizga sadoqatning 20 yillik tarixiy yo‘li
Ansamblning yubiley bayrami keng nishonlandi.
2025-yil 20-may kuni Uchtepa tuman Madaniyat markazida “Durdona” folklor ansamblining tashkil topganiga 20 yil to‘lishi munosabati bilan tantanali yubiley bayrami bo‘lib o‘tdi.
Tadbirda tumandagi madaniyat va san’at sohasida faoliyat yuritayotgan ijodkorlar, jamoatchilik vakillari, faxriy ustozlar hamda yoshlar ishtirok etdilar. Bayramona kechada “Durdona” ansambli tomonidan tayyorlangan milliy kuy-qo‘shiqlar, an’anaviy raqslar, sahna ko‘rinishlari tomoshabinlar olqishiga sazovor bo‘ldi. Milliy liboslar, doira sadosi va zamonaviy sahnalashtirish orqali ansambl a’zolari o‘zbek xalqining boy madaniy merosini yana bir bor yorqin tarzda namoyish etdilar.
Tadbir davomida katta ekranda ansamblning o‘tgan yillardagi faoliyatini aks ettiruvchi fotolavhalar namoyish etildi. Bu orqali tomoshabinlar ansamblning bosib o‘tgan yo‘li, yutuqlari va sahnadagi unutilmas lahzalar bilan yaqindan tanishish imkoniga ega bo‘ldilar.
Tantanali kechada so‘zga chiqqanlar “Durdona” ansamblining tuman madaniy hayotida tutgan o‘rnini alohida e’tirof etib, ularning yoshlarga bergan tarbiyaviy ta’siri, xalq og‘zaki ijodiyoti va an’analarini asrab-avaylash borasidagi xizmatlarini yuqori baholadilar.
Eslatib o‘tamiz, “Durdona” folklor ansambli 2004-yilda tashkil etilgan bo‘lib, shu kungacha o‘nlab mahalliy va respublika miqyosidagi tadbirlarda ishtirok etib kelmoqda. Ansambl faoliyati milliy madaniyatni asrash, xalq og‘zaki ijodi va qadimiy kuy-qo‘shiqlarni yosh avlodga yetkazish kabi ezgu maqsadlarga xizmat qilib kelmoqda.
