Xorazmda metallomga topshirilgan snaryad portlab ketdi
Hodisa oqibatida bir kishi halok bo‘lgan.
11-aprel kuni Xorazm viloyati, Yangiariq tumanidagi metallom qabul qilish shoxobchasida snaryad portlashi oqibatida 31 yoshli ishchi halok bo‘ldi. Portlash yig‘ilgan temirlar tushirilayotgan vaqtda sodir bo‘lgan.
Vafot etgan O.B. ikki farzandning otasi bo‘lib, oila boquvchisi bo‘lgan. Internetda tarqalgan videoda uning onasi hodisa uchun mas'ullarga qat'iy jazo berilishini so‘radi.
Manbaga ko‘ra, portlagan snaryadlar Qoraqalpog‘istonning Amudaryo tumanidagi harbiy xizmatchilardan noqonuniy tarzda sotib olingan. Voqeani o‘rganish chog‘ida shoxobchadan yana 30 ga yaqin snaryad topilgan.
Hozirda ish bilan harbiy prokuratura shug‘ullanmoqda. Harbiy xizmatchilar va metallom yig‘uvchilarga nisbatan tergov boshlangan, ayrim shaxslar qamoqqa olingan.
