“Afrosiyob” emas, manyovr lokomotivi yondi
“O‘zbekiston temir yo‘llari” rasmiy izoh berdi.
Chorshanba kuni kechqurun ijtimoiy tarmoqlarda “Afrosiyob” poezdida yong‘in chiqqani aks etgan video tarqaldi. Bunga izoh bergan “O‘zbekiston temir yo‘llari” kompaniyasi, hodisa tez yuruvchi poezdga emas, yordamchi harakatlar uchun xizmat qiluvchi manyovr lokomotiviga taalluqli ekanini ma’lum qildi.
“Afrosiyob” poezdi yong‘inga uchramagan va reja asosida ertaga harakatni davom ettiradi. Yong‘in vaqtida poezdda yo‘lovchilar bo‘lmagan. Hodisa reysdan tashqarida sodir bo‘lgan”, — deyiladi kompaniya bayonotida.
Mutaxassislar tomonidan yong‘in tezda o‘chirilgan. “O‘zbekiston temir yo‘llari” hodisa bo‘yicha keyinchalik batafsil ma’lumot berilishini bildirgan. Shu bilan birga, “Afrosiyob” poezdining barcha yo‘nalishlari odatdagi jadval asosida qatnayveradi.
