Toshkentda YPX xodimini haqoratlagan ayol uzr so‘rab chiqdi

Ijtimoiy tarmoqlarda ayol kishi va IIO xodimi o‘rtasida janjal chiqqani aks etgan video tarqaldi. Holat yuzasidan Toshkent shahar IIBB YHXB Matbuot xizmati rasmiy munosabat bildirdi.

 

Maʼlum qilinishicha, YPX xodimi Gentra rusumli avtomobilni to‘xtatgan. Haydovchining monitordan foydalanib kelayotgani aniqlangani sababli xodim unga maʼmuriy bayonnoma rasmiylashtirmoqchi bo‘lgan. Shunda haydovchi qo‘l qo‘yishdan bosh tortib, xodimga qarshilik ko‘rsatgan.

 

So‘ngra haydovchining ortidan ayol kishi kelib, xodimga nisbatan turli haqoratli so‘zlarni ishlatgan.

 

Aniqlanishicha, janjal ko‘targan ayolning hujjatlari ham tekshirilganda, transport vositasini boshqarish huquqidan mahrum qilinganligi maʼlum bo‘lgan.

 

Qolaversa, mashinasining oldi oynasidagi tonirovka uchun ruxsatnomasi yo‘qligi aniqlangan.

 

“Meni videoga olishni boshladi. Video olmasligi uchun qo‘llaridagi telefonni olib qo‘ydim. Keyin jarima maydoniga olib boramiz deyishdi. Birinchi qarshilik ko‘rsatdim. So‘ngra jarima maydoniga bordim. O‘zim bilmagan holda yaʼni jahl ustida haqoratli so‘zlarni ishlatdim. Ichki ishlar xodimlaridan va xalqimizdan haqoratli so‘zlar ishlatganligim uchun uzr so‘rayman”,- deydi ayol haydovchi.

 

Jamoat joyida yurish-turish qoidasini qasddan mensimasdan harakat qilgan, IIO xodimlarining qonuniy talablarini bajarmagan va YPX xizmati inspektorini obro‘sizlantirishga uringan ushbu qoidabuzarlar ustidan sud majlisi o‘tkazildi.

 

Sud qaroriga ko‘ra, ayol haydovchi MJtKning 41-moddasi, 194-moddasi 1-qismida ko‘rsatilgan huquqbuzarlikni sodir etganlikda aybli deb topildi. Unga nisbatan BHMning 30 barobari miqdorida jarima jazosi tayinlandi.

 

Erkak haydovchi MJtKning 183-194- moddasi 1-qismida ko‘rsatilgan huquqbuzarlikni sodir etganlikda aybdor deb topildi. Unga nisbatan 10 sutka maʼmuriy qamoq jazosi tayinlandi.