Mahalliy multifilmlarimiz soni ko'paymoqda
1-iyun – Xalqaro bolalarni himoya qilish kuni munosabati bilan yangi animatsion film taqdimoti bo‘lib o‘tdi.
Kecha Oʻzbekiston Milliy kino sanʼati saroyida O‘zbekiston Respublikasi Madaniyat vazirligi huzuridagi Kinematografiya agentligi tashabbusi bilan bolajonlarimiz uchun yangi animatsion film — “Musbatoy va Manfiybek”ning bayramona namoyishi bo‘lib o‘tdi.
Mazkur loyiha Kinematografiya agentligi buyurtmasi asosida “Renessans TV” bilan hamkorlikda tayyorlangan bo‘lib, film tomoshabinlarga bepul taqdim etildi.
Tomoshabinlar, mehmonlar va bayramona kayfiyat
Namoyishda kinoijodkorlar, Toshkent shahridagi mehribonlik uyi tarbiyalanuvchilari, yurtdoshlarimiz hamda ommaviy axborot vositalari vakillari ishtirok etdi. Tadbir davomida kichkintoylar uchun turli sovg‘alar, attraksionlar, ko‘ngilochar o‘yinlar va boshqa bayramona tadbirlar tashkil etildi.
Multfilm mazmuni va tarbiyaviy yo‘nalishi
Film asosiy qahramonlari — Musbatoy va Manfiybek — xarakteri jihatidan bir-biridan keskin farq qiluvchi obrazlar bo‘lib, hayotdagi doimiy qarama-qarshilikni ifodalaydi. Ular orqali bolajonlarda butun borliq va dunyo haqida keng tasavvur shakllantirish maqsad qilingan. Multfilmda axborot asrida bolalarda tashqi mafkuralarga nisbatan "o‘zlik" immunitetini shakllantirish hamda milliy qadriyatlarimizni eslatish g‘oyasi ilgari surilgan. Ssenariyda esa muallif milliy qadriyatlarimizni silliq va sodda ifodalash orqali kichkintoylarga ongli ta’sir o‘tkaza olgan.
Yana bir kun davom etadigan kino bayrami
Shu bilan birga, Kino saroyining barcha zallarida o‘zbek va rus tillarida turli janrdagi filmlar ham bepul namoyish etildi. Ushbu namoyishlar 2-iyun kuni ham davom etishi rejalashtirilgan.
Gavhar Ziyodullayeva, jurnalist
