Vazirlar va qo‘mita raisi bolalik xotiralari bilan bo‘lishdi
Bugungi O‘zbekiston vazirlari — cho‘pon bola, Germaniyada tug‘ilgan qizaloq, qo‘rqmas yigitcha, va tomorqa zimmasida bo‘lgan o‘spirin.
Oliy ta’lim, fan va innovatsiyalar vaziri Qo‘ng‘irotboy Sharipov 1963-yil 24-mart kuni Qoraqalpog‘iston Respublikasi Qo‘ng‘irot tumanida tug‘ilgan.
“Katta oilada o‘sganman. 10 nafar farzandning beshinchisiman. Otam davlat xizmatchisi bo‘lgan, tarbiyamiz bilan onam shug‘ullangan. O‘ynashga vaqtimiz bo‘lmasdi. Maktabdan keyin chorva, tomorqa zimamizda edi. Kitob o‘qish, dars qilishimizni dam olishdek qabul qilardik”.
Davlat soliq qo‘mitasi raisi Sherzod Kudbiyev 1981-yil 12-aprel kuni Farg‘ona viloyatida tug‘ilgan. Bolaligi Samarqand viloyatida o‘tgan.
“Juda sho‘x bo‘lganman, 9 qavatli uyning zinapoyasi (pojarniy)ga osilib chiqib, pastga tushish men uchun oddiy mashg‘ulot bo‘lgan — qo‘rqmas, to‘xtamas bola edim. Erta ulg‘aygansan, deyishadi. Rostdan ham shunday bo‘lgan — men maktabga ham tengdoshlarimdan ertaroq borganman. 15 yoshimda talaba bo‘ldim”.
Maktabgacha va maktab ta’limi vaziri Hilola Umarova 1988-yilda Germaniyaning Veymar shahrida tug‘ilgan.
“Germaniyada tug‘ilib, maktab yoshigacha o‘sha yerda katta bo‘ldim. Keyin Toshkentga kelib, maktabda o‘qidim”.
Qishloq xo‘jaligi vaziri Ibrohim Abdurahmonov 1975-yil Namangan viloyati Chust tumanida tug‘ilgan. Bolaligi olis qishloqda o‘tgan.
“Bolalikda menga topshirilgan eng muhim yumush qo‘y boqish bo‘lgan. Ertalab ikkita nonni belimizga tugib, dalaga qo‘y boqishga ketardik, kechqurun qo‘yni haydab yana ortga qaytardik”.
