Oliy Majlisda elektr energiyasi tariflari bo‘yicha tushuntirish berildi
Aholining 70 foizi oyiga 300 kVt/soatgacha elektr energiyasi iste’mol qiladi.
Bugun Toshkent shahrida Oliy Majlis Qonunchilik palatasining navbatdagi yig‘ilishi bo‘lib o‘tdi. Majlisda Bosh vazir o‘rinbosari — Iqtisodiy taraqqiyot va kambag‘allikni qisqartirish vaziri Jamshid Qo‘chqorov davlat byudjeti ijrosi yuzasidan axborot berdi hamda elektr energiyasi tariflaridagi o‘zgarishlar bo‘yicha tushuntirish berdi.
Tariflar qanday o‘zgardi?
Jamshid Qo‘chqorovning ta’kidlashicha, O‘zbekistonda 7,6 millionta elektr energiyasi iste’molchisi mavjud bo‘lib, ularning 70 foizi oyiga 300 kVt/soatgacha elektr energiyasi iste’mol qiladi.
“Tariflar oshirilishida hech qanday jiddiy muammo ko‘rmayapmiz. Agar bir oila oyiga 300 kVt/soat tok ishlatsa, to‘lov miqdori avvalgidan 20 ming so‘mga ko‘payadi — 180 ming so‘mdan 200 ming so‘mga,” — dedi Qo‘chqorov.
U shuningdek, taqqoslash uchun, respublikada har bir mobil aloqa abonenti o‘rtacha 35 ming so‘m to‘layotganini, aksar oilalarda esa uchta telefon borligini eslatdi.
Tariflar tafsiloti:
200 kVt/soatgacha: narx 450 so‘mdan 600 so‘mga oshirildi.
Bu hajmdagi iste’molchilar o‘rtacha 30 ming so‘m ko‘proq to‘laydi.
201–500 kVt/soat oralig‘i: narx 900 so‘mdan 800 so‘mga pasaytirildi.
Qo‘chqorovning hisob-kitoblariga ko‘ra, agar oila oyiga 500 kVt/soat tok ishlatsa, umumiy xarajat o‘zgarmaydi — oldin ham, hozir ham 360 ming so‘m atrofida to‘lanadi.
Shuningdek, vazir oyiga 1000 kVt/soat va undan ortiq elektr ishlatadigan xonadonlar mamlakatda kam ekanini qayd etdi.
Hukumat vakilining aytishicha, energiya narxi oshirilishiga qaramay, ijtimoiy yordam tizimi hamda himoya choralar ko‘zda tutilgan.
