Termizda “svet o‘g‘risi” aniqlandi
U davlatga 300,5 million so‘mlik zarar yetkazgan.
Surxondaryo viloyatining Termiz tumanida joylashgan umumiy ovqatlanish shoxobchasida noqonuniy elektr sarfi aniqlandi.
“O‘zenergoinspeksiya”ning viloyat boshqarmasi, viloyat prokuraturasi hamda Ichki ishlar boshqarmasi bilan hamkorlikda o‘tkazilgan nazorat tadbirida, “Z. Sh.” MChJga qarashli binoda elektr energiyasi hisoblagichdan chetlab o‘tib, ya’ni to‘lovsiz tarzda ishlatilgani aniqlandi.
Dastlabki hisob-kitoblarga ko‘ra, bu qonunbuzarlik tufayli elektr ta’minoti korxonasiga 300,5 million so‘mlik zarar yetkazilgan.
Hozirda mazkur holat yuzasidan tergovga qadar tekshiruv ishlari olib borilmoqda.
