O‘zbekistonda maktabgacha ta’lim 7 yilda tub o‘zgarishga yuz tutdi
Maktabgacha ta’limda qamrov 3 barobar, tashkilotlar soni 7 barobar oshdi.
O‘zbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti (MHTI) mutaxassislari tomonidan 2017–2024 yillar oralig‘ida maktabgacha ta’lim tizimida amalga oshirilgan o‘zgarishlar chuqur tahlil qilindi.
Tahlil natijalariga ko‘ra, ushbu davrda maktabgacha ta’lim tashkilotlari soni 7 barobar oshib, 2024-yil oxiriga kelib 38 058 taga yetgan. 2017-yilda bu ko‘rsatkich atigi 5 186 tani tashkil etgan edi.
Shu bilan birga, muassasalardagi o‘rinlar soni 3,3 barobarga oshib, 2,4 million bolani qamrab olish imkoniyati yaratilgan. 3–6 yoshdagi bolalarni maktabgacha ta’lim bilan qamrab olish darajasi esa 25,4 foizdan 76 foizgacha ko‘tarilib, qariyb 3 barobar oshgan.
Pedagog xodimlar soni ham sezilarli darajada ortib, 175 ming nafarga yetgan. Har bir pedagogga o‘rtacha 13,4 nafar bola to‘g‘ri kelmoqda. Bu esa pedagogik ta’minotda sifat va barqarorlikni ta’minlashga xizmat qilmoqda.
2020-yilda "Finance Inquirer" nashrining YUNICEF, Jahon banki va RGCA (Research Group Central Asia) ma’lumotlariga asoslangan reytingida O‘zbekiston bolalarni maktabgacha ta’lim bilan qamrab olish bo‘yicha dunyodagi eng yaxshi o‘sish sur’atini namoyon qilgan 10 mamlakatdan biri sifatida birinchi o‘rinni egalladi.
2023-yil 9-oktyabrdan boshlab mamlakat bo‘ylab ilk bor MELQO xalqaro baholash tizimi asosida maktabgacha ta’lim sifati baholandi. Baholash natijalariga ko‘ra:
bolalarning erta matematika ko‘nikmalari — 94 foiz,
erta savodxonlik ko‘nikmalari — 77 foizdan yuqori,
baholashda ishtirok etgan tashkilotlarning 90 foizi o‘quv-metodik adabiyotlar bilan to‘liq ta’minlangan.
Shu bilan birga, Jahon banki ko‘magida boshlangan “Bolalarni erta rivojlantirish tizimini takomillashtirish” loyihasi doirasida 9 ta hududda 30 ta mobil avtobus orqali 142 ta ko‘chma guruh tashkil qilindi va 2 528 ta yangi o‘rin yaratildi. Bu imkoniyati cheklangan hududlardagi bolalarning ta’limga teng kirishini ta’minlashga xizmat qilmoqda.
“O‘zbekiston – 2030” strategiyasida esa quyidagi muhim vazifalar belgilangan:
barcha bolalarni maktabgacha ta’lim bilan to‘liq qamrab olish;
kompyuter sinflarini joriy qilish orqali boshlang‘ich raqamli savodxonlikni shakllantirish;
barcha maktabgacha ta’lim muassasalarini toza ichimlik suvi va zamonaviy gigiyena infratuzilmasi bilan ta’minlash.
