Saida Mirziyoyeva Amerika-O‘zbekiston savdo palatasi raisi bilan uchrashdi
Tomonlar kelajakdagi istiqbolli loyihalarni muhokama qilgan.
Prezident yordamchisi Amerika-O‘zbekiston savdo palatasi raisi Kerolin Lemm bilan uchrashdi.
Unda ikki mamlakat o‘rtasidagi iqtisodiy munosabatlarning hozirgi holati va kelajakdagi istiqbolli yo‘nalishlari muhokama qilindi.
“Suhbat davomida biz uchun ustuvor bo‘lgan mavzularga — ayollar uchun imkoniyatlarni kengaytirish va biznes bilan shug‘ullanishni xohlagan barcha fuqarolar uchun teng shart-sharoit yaratish masalalariga alohida eʼtibor qaratildi. Shuningdek, O‘zbekiston-Amerika biznes forumi — ikki davlatning 150 dan ortiq ishbilarmonlari o‘rtasida yangi loyiha va g‘oyalarni to‘g‘ridan-to‘g‘ri muhokama qilish uchun samarali va o‘ziga xos platforma ekani taʼkidlandi.
Lemm xonim tomonidan taqdim etilgan, O‘zbekistonda shaffoflik tamoyillarini ilgari surish, jamoatchilik bilan ochiq muloqotni rivojlantirish va axborot siyosatini modernizatsiya qilish borasidagi saʼy-harakatlarimizni eʼtirof etuvchi mukofot uchun samimiy minnatdorlik bildiraman”, deb yozdi Mirziyoyeva o‘z sahifasida.
