Bola puli miqdori oshdi, ammo uni olayotganlar keskin kamaydi
O‘zbekistonda bola puli oluvchilar soni bir yil ichida ikki barobarga qisqardi.
O‘zbekistonda bolalarga mo‘ljallangan ijtimoiy nafaqa — bola puli bo‘yicha oxirgi yildagi statistika e’tiborli o‘zgarishlarni ko‘rsatmoqda. 2024-yil boshida bola puli olayotgan oilalar soni 1,9 millionni tashkil etgan bo‘lsa, 2025-yilning birinchi choragida bu ko‘rsatkich 774 ming oilagacha tushgan.
Shunga qaramay, bola puliga ajratilayotgan umumiy mablag‘ hajmi oshgan. Masalan, 2024-yil yanvarida ushbu yo‘nalishga 888,7 milliard so‘m, 2025-yilning birinchi choragida esa 1,16 trillion so‘m yo‘naltirilgan. Bu — oluvchilar soni kamaygan bo‘lsa-da, yagona to‘lov miqdorining oshirilganini bildiradi.
Hududlar kesimida eng katta qisqarish Qashqadaryo, Samarqand, Namangan, Farg‘ona, Andijon va Surxondaryo viloyatlarida kuzatilgan. Jumladan, Qashqadaryoda bola puli olayotgan oilalar soni 225 mingdan 44 minggacha tushgan.
Yana bir muhim yangilik shuki, 2025-yil iyul oyidan boshlab bola puli miqdori yana 10 foizga oshiriladi. Ayni vaqtda bola pulining amaldagi miqdorlari quyidagicha:
- 3 yoshgacha bo‘lgan bolalar uchun – 325 ming so‘m (iyuldan 360 ming so‘m)
- 3 yoshdan katta bolalar uchun – 250 ming so‘m (iyuldan 275 ming so‘m)
- Ikkinchi farzand uchun – 150 ming so‘m (iyuldan 165 ming so‘m)
- Uchinchi va undan keyingi farzandlar uchun – 100 ming so‘m (iyuldan 110 ming so‘m).
