Buxoroda ayol farzandini 10 mln so‘mga sotmoqchi bo‘ldi
Sud hukmi bilan u 3 yil 6 oy muddatga qamaldi.
Oliy sudning xabar berishicha, N.K. buxorolik tanishi bilan birga yashab, 2024 yil iyun oyida Turkiyaga ishlash maqsadida ketadi va 2024 yil avgust oyida xorijiy davlatdan qaytib kelib, shu oyda qiz farzandini dunyoga keltiradi. U yana ishlash maqsadida Turkiyaga ketishni rejalashtiradi va buning uchun farzandini sotmoqchi bo‘ladi.
2024 yilning 4 sentyabr kuni IIB va DXX xodimlari tomonidan o‘tkazilgan tezkor tadbirda N.K. o‘zining 2024 yil 21 avgustda tug‘ilgan farzandini 10 million so‘mga sotib, voyaga yetmagan farzandini sotganligi bo‘yicha tilxat yozib bergan vaqtida ashyoviy dalillar bilan ushlangan.
Aybdor ayolning qilmishi nafaqat o‘zining ko‘rsatmasi, balki pullarni ko‘zdan kechirish, kimyoviy ishlov berish va yozib olingan ovozlar, voqea joyini ko‘zdan kechirish hamda ashyoviy dalillarni olib qo‘yish haqidagi bayonnoma, ekspertiza xulosasi va guvohlarning ko‘rsatmalari bilan tasdiqlandi.
Sud tomonidan N. K. Jinoyat kodeksining 135-moddasi 3-qismi “a” bandida nazarda tutilgan jinoyatni sodir etganlikda aybli deb topilib, unga 3 yil 6 oy muddatga ozodlikdan mahrum qilish jazosi tayinlandi.
