Eldor Shomurodov Turkiya klubiga o‘tishi mumkin
Shomurodov klub taklifiga ijobiy munosabat bildirgan.
O‘zbekiston terma jamoasi sardori Eldor Shomurodov faoliyatini Turkiya Superligasida davom ettirishi mumkin. Turkiyaning “Bashakshehir” klubi 29 yoshli hujumchini o‘z safiga qo‘shib olish uchun jiddiy harakat qilmoqda, deb xabar bermoqda “Gazetaarena”.
Insayderlarga ko‘ra, Eldor “Bashakshehir” taklifiga ijobiy munosabat bildirgan va tomonlar allaqachon uchrashgan. Shuningdek, “Galatasaroy”, “Fenerbahche”, “Beshiktosh” va “Trabzonspor” kabi yirik klublar ham unga qiziqish bildirgan.
“Roma” klubi esa Shomurodovni yozda sotish niyatida, chunki uning shartnomasi 2026-yil yozida yakunlanadi va klub futbolchidan maksimal foyda olishga harakat qilmoqda. Ayni paytda MLS’dagi klublar ham Eldorga qiziqmoqda.
Eslatib o‘tamiz, Eldor Shomurodov joriy mavsum “Roma” safida 37 o‘yinda maydonga tushib, 7 ta gol urdi va 5 ta golli uzatma berdi. Transfermarkt portali uning transfer qiymatini 5 million yevroga baholagan.
