O‘zbekiston paxtachiligida tarixiy rekord: ilk bor 5 mln tonnadan ortiq hosil yetishtirildi
Hosilning 85 foizi 3 mingdan ortiq zamonaviy paxta terish mashinasi yordamida yig‘ib olingan.
2026-yilda O‘zbekistonda ilk bor 5 million tonnadan ziyod paxta xomashyosi yetishtirilib, tarixiy natijaga erishildi. So‘nggi yillarda mamlakatda paxta hosildorligi ham sezilarli darajada oshdi.
Ma’lumotlarga ko‘ra, paxta hosildorligi so‘nggi yillarda gektariga 21 sentnerdan 56 sentnerga yetgan. Joriy yilda qariyb 400 ming gektar maydonda o‘rtacha hosildorlik 70 sentnerni tashkil etgan. Salkam 70 ming gektarda esa har gektardan 100–110 sentnergacha hosil olingan.
Bu natijaga erishishda ilm-fan va ishlab chiqarish integratsiyasining kuchaytirilishi, mahalliy tuproq-iqlim sharoitiga mos serhosil navlar hamda zamonaviy agrotexnologiyalardan foydalanish muhim omil bo‘lgan.
Shuningdek, ilg‘or agrotexnik usullar, ekish va parvarishlash texnologiyalari takomillashtirilgan. Suv tejovchi texnologiyalar joriy etilishi natijasida paxtachilikda suv sarfi 1990-yillarga nisbatan ikki baravar kamaygan.
Joriy yilda yetishtirilgan paxta hosilining 85 foizi 3 mingdan ortiq zamonaviy paxta terish mashinasi yordamida 30–35 kun ichida yig‘ib olingan. Jizzax va Sirdaryo viloyatlarida mexanizatsiyalashgan terim darajasi 100 foizga yetgan.
Hisob-kitoblarga ko‘ra, joriy yilda fermer xo‘jaliklarining paxta yetishtirishdan oladigan sof foydasi 13–14 trillion so‘mni tashkil etishi kutilmoqda.
Kelgusi yilda paxta hosildorligini o‘rtacha 65–70 sentnerga yetkazish maqsad qilingan. Buning uchun serhosil navlar, agrodrонlar, suv va energiya tejovchi texnologiyalar hamda sun’iy intellekt imkoniyatlaridan foydalanish rejalashtirilgan.
