Toshkentda taniqli bloger o'z uyida Nil timsohini saqlab kelayotganligi aniqlandi
Timsoh Toshkent hayvonot bog‘iga topshirildi, huquqbuzarga esa chora ko'rildi.
Ijtimoiy tarmoqlarda fuqaroning o‘z uyida Nil timsohini saqlayotganligi haqidagi videoyozuvlar tarqalgach, Ekologiya, atrof-muhitni muhofaza qilish va iqlim o‘zgarishi vazirligi mutasaddilari zudlik bilan holatni o‘rganishga kirishdi.
Tezkor reyd davomida Toshkent shahrida istiqomat qiluvchi fuqaroning yashash manzilidan bir bosh Nil timsohi aniqlanib, musodara qilindi. Mazkur yovvoyi hayvon Toshkent hayvonot bog‘iga topshirildi. Bu haqda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Ma’lumot o‘rnida aytish joizki, Vazirlar Mahkamasining 736-son qaroriga muvofiq, 2025-yil 1-yanvardan boshlab yovvoyi hayvonlarni (ro‘yxat asosida) jismoniy shaxslar tomonidan uy sharoitida saqlash hamda ularni sirk tomoshalarida ishlatish qat’iyan taqiqlanadi.
Huquqbuzar bilan Ma’muriy javobgarlik to‘g‘risidagi kodeksning 92 prim 1-moddasi 1-qismi asosida bayonnoma rasmiylashtirildi. Ish hujjatlari huquqiy baho berish va chora ko‘rish uchun sud organlariga yuborilgan.
Ekologik nazorat tadbirlari respublikaning barcha hududlarida davom ettirilmoqda.
