Toshkentda 2 tonnalik “ajal” yonib kulga aylandi
Bugun, 26-iyun — Xalqaro giyohvandlikka qarshi kurashish kuni munosabati bilan Toshkent shahrida tadbir tashkil etildi. Unda 2 tonnadan ortiq narkotik yoqib yo‘q qilindi.
26-iyun — Xalqaro giyohvandlikka kurashish kuni munosabati bilan Davlat xavfsizlik xizmati, davlat bojxona qo‘mitasi va hamkor tashkilotlar tomonidan International Hotel Tashkent mehmonxonasida xalqaro ekspertlar, ommaviy axborot vositalari xodimlari ishtirokida tadbir tashkil etildi.
Tadbir davomida dunyodagi narkovaziyat haqida maʼlumot berilib, ishtirokchilarning diqqati raqamlarga qaratildi. Unga ko‘ra, hozirda dunyoda qariyb 300 mln kishi giyohvandlik vositalarini isteʼmol qilyapti, qurbonlar soni esa bir yilda 600 ming kishidan oshmoqda.
So‘nggi 5 yilda O‘zbekistonda narkojiniyatlar soni qariyb 2 baravarga, noqonuniy muomaladan olingan narkotiklar musodarasi 8,5 baravarga oshgan bo‘lsa, sintetik giyohvandlik vositalari musodarasi 80 baravarga keskin ko‘paygan.
Shuningdek, tadbirda o‘tgan bir yil mobaynida O‘zbekiston hududida huquqni muhofaza qiluvchi organlar tomonidan noqonuniy muomaladan musodara qilingan giyohvandlik vositalari, psixotrop moddalar, kuchli taʼsir qiluvchi dori vositalarinning yo‘q qilish jarayoni onlayn tarzda namoyish etildi.
Tadbirda giyohvandlik vositalariga bo‘lgan tobelikdan davolanib chiqqan hamda narkojinoyat uchun jazoni o‘tab kelgan fuqarolarga so‘z berildi. Narkotiklar changalidan qutulib, yangi hayotni boshlagan ushbu shaxslar ramziy tugmani bosib, giyohvand moddalarni yo‘q qilish jarayoniga start berdi.
Davlat xavfsizlik xizmatining maʼlum qilishicha, yoqish marosimida jami 2 tonna 135 kg 188 gramm narkotik yo‘q qilingan.
