Toshkentda 3 yoshli bolani OLX’da sotuvga qo‘ygan shaxs uning akasi bo'lib chiqdi
Aka sho‘xligi sabab ukasining “ta’zirini" berib qo'ymoqchi bo'lgan.
Ijtimoiy tarmoqlarda 3 yoshli bola OLX savdo platformasida sotuvga qo‘yilgani haqidagi e’lon katta shov-shuvga sabab bo‘ldi. Holat yuzasidan bolalar ombudsmani izoh berdi.
Tezkor-qidiruv ishlari natijasida e’lon Toshkent shahri, Uchtepa tumanida yashovchi 13 yoshli bola tomonidan joylashtirilgani aniqlandi. U 3 yoshli ukasini sho‘xligi uchun “ta’zirini berish” maqsadida OLX’da 150 ming so‘m narxda sotuvga qo‘ygan.
Bolalar ombudsmani bu harakatni “bolalarcha o‘ylovsiz qadam” sifatida baholadi. Unga ko‘ra, bola bu ishning jiddiy oqibatlarini tushunmagan.
Hozirda Uchtepa tuman IIB tomonidan tergovga qadar surishtiruv ishlari olib borilmoqda. Bolalar ombudsmani holat yuzasidan monitoringni davom ettirmoqda.
Mutaxassislar bunday holatlar bolalar bilan ishlashda raqamli savodxonlik va internet madaniyatini o‘rgatish muhimligini yana bir bor ko‘rsatganini ta’kidlamoqda.
