Yaponiyada to‘qqiz kishini o‘ldirgan “Twitter qotili” qatl etildi
Bu mamlakatda 2022-yildan buyon ijro etilgan ilk o‘lim jazosi hisoblanadi.
Yaponiyada 2017-yilda to‘qqiz kishini vahshiylarcha o‘ldirgan Takahiro Shiraishi qatl etildi. Bu mamlakatda 2022-yildan buyon ijro etilgan ilk o‘lim jazosi bo‘lib, Shiraishi keng jamoatchilikka “Twitter qotili” nomi bilan tanilgan edi. BBC xabariga ko‘ra, Shiraishining jinoyatlari butun mamlakatni larzaga keltirgan.
U o‘sha paytda 30 yoshda bo‘lib, Twitter (hozirda X) orqali asosan 15 yoshdan 26 yoshgacha bo‘lgan, o‘z joniga qasd qilishga moyil bo‘lgan yosh ayollar bilan tanishib, ularni aldab kvartirasiga olib borgan. U yerda ularni bo‘g‘ib o‘ldirgan va jasadlarini bo‘laklarga ajratgan. Politsiya 2017-yil oktabrida Tokioning Zama shahridagi kvartirasida jasad qismlarini topgan. Shiraishi o‘z qurbonlariga o‘lishlariga yordam berishini aytgan va ba’zilari bilan o‘zini ham o‘ldirishni rejalashtirganini bildirgan.
Sud jarayonida Shiraishining advokatlari ularni qurbonlarning roziligi bilan o‘ldirganini da’vo qilib, jazo yengillashtirilishini so‘rashgan. Ammo Shiraishi bu fikrlarni rad etib, ularni hech qanday roziliksiz o‘ldirganini tan olgan. Natijada, 2020-yil dekabrida u o‘lim jazosiga hukm qilindi. Sud majlisini yuzlab odamlar kuzatgan va bu ish Yaponiyada ommaviy muhokamaga sabab bo‘lgan.
Ushbu jinoyatlar Twitter platformasining siyosatiga ham ta’sir ko‘rsatgan. Endilikda tarmoqda o‘z joniga qasd qilish yoki o‘ziga zarar yetkazishni targ‘ib qilish qat’iyan man etilgan. Shu tariqa, Shiraishining jinoyatlari nafaqat Yaponiyani larzaga soldi, balki internet xavfsizligi bo‘yicha xalqaro munozaralarga ham turtki berdi.
