O‘zbekistonda maktab – universitet integratsiyasi bo‘yicha yangi tizim joriy etiladi
O‘quvchilar endilikda 7-sinfdan boshlab universitet bilan hamkorlikda o‘qiydi.
2025-yil 1-sentabrdan boshlab O‘zbekistonda ta’lim tizimiga “maktab – texnikum (litsey) – universitet” tamoyiliga asoslangan yangi kadrlar tayyorlash modeli joriy etiladi. Ushbu yondashuv orqali o‘quvchilar uzluksiz, bosqichma-bosqich va kasbiy yo‘naltirilgan holda tahsil olishadi.
Yangi tizim doirasida ta’lim jarayonining kamida 25 foizi xorijiy professorlar va xalqaro malaka sertifikatiga ega bo‘lgan mutaxassislar ishtirokida amalga oshiriladi. Bu o‘quvchilarga xalqaro standartlarga mos bilim va ko‘nikmalarni shakllantirish imkonini beradi.
Tajriba tariqasida, 2025-yil 1-sentabrdan Toshkent shahrining Yunusobod tumanidagi 250- va 273-sonli umumta’lim maktablari tanlab olinib, ular universitetga biriktiriladi. Universitet mazkur maktablarda tahsil olayotgan 7–9-sinf o‘quvchilari uchun har oyda ularning qiziqishlari bo‘yicha fakultativ mashg‘ulotlar tashkil etadi. Ushbu mashg‘ulotlar bevosita universitet laboratoriyalarida o‘tkaziladi.
Bundan tashqari, universitet o‘quvchilarning laboratoriyalarga muntazam va xavfsiz tashriflarini tashkil qilish uchun mas’ul etib belgilanadi. Bu yondashuv ta’lim tizimida nazariya va amaliyotning uyg‘unligini ta’minlashga xizmat qiladi.
