Qoraqalpog‘istonda yangi turizm hududi barpo etiladi
Ellikqal’a tumanida zamonaviy turizm zonasini yaratish loyihasi boshlangan.
Qoraqalpog‘iston Respublikasi Ellikqal’a tumanida umumiy qiymati 73,4 milliard so‘mlik turizm-rekreatsion zonani tashkil etish loyihasi amalga oshirilmoqda. Bu haqda Jo‘qorg‘i Kenges matbuot xizmati ma’lum qildi.
Mazkur loyiha Zarbdor tajribasi asosida Oqchako‘l sohilida amalga oshiriladi. Loyihaga ko‘ra, hudud to‘liq infratuzilma bilan ta’minlanib, unda 3 ta mehmonxona, 18 ta mehmon uyi, 20 ta o‘tov, 2 ta restoran va boshqa xizmat ko‘rsatish obyektlari barpo etiladi. Rejaga muvofiq, loyiha ishga tushishi natijasida 75 ta yangi ish o‘rni yaratiladi.
Shuningdek, 2025-yildan boshlab O‘zbekistonda har yili noyabr oyida “Eng namunali yashil turizm obyekti” tanlovi o‘tkazilishi belgilangan. Bu tanlov “Turizm obyektlari va joylashtirish vositalarida atrof-muhitga salbiy ta’siri kamaytirilgan mahsulotlardan foydalanish va ekologik talablarga muvofiq xizmatlar ko‘rsatishni rag‘batlantirish chora-tadbirlari to‘g‘risida”gi qarorga asosan joriy qilinadi.
Tanlovning asosiy maqsadlari quyidagilardan iborat:
ekologiya va atrof-muhitni muhofaza qilish, chiqindilar bilan ifloslanishning oldini olish;
turizm obyektlarida plastik mahsulotlardan foydalanishni cheklash va ularni ekologik toza mahsulotlarga almashtirish;
texnik va ekologik standartlarga rioya etilishini ta’minlash;
innovatsion va istiqbolli tashabbuslarni qo‘llab-quvvatlash.
Mazkur yondashuv nafaqat turizm salohiyatini oshirish, balki hududlarda ekologik barqarorlikni ta’minlashga ham xizmat qiladi.
