O‘zbekistonda nodavlat OTMlar uchun yangi litsenziya talablari joriy etildi
Qaror rasmiy e’lon qilingan sanadan 3 oy o‘tgach kuchga kiradi.
Vazirlar Mahkamasining 403-sonli qaroriga ko‘ra, O‘zbekistonda nodavlat oliy ta’lim muassasalarini (OTM) litsenziyalash tartibiga qo‘shimcha talablar kiritildi.
Endilikda OTM ochmoqchi bo‘lgan talabgor:
– ta’lim muassasasining konsepsiyasini (nomi, maqomi, yo‘nalishlari, boshqaruv tizimi, to‘lov miqdori, 5 yillik rivojlanish rejasi va boshqalar) taqdim etishi;
– 2 mln AQSh dollari ekvivalentida ustav fondiga ega bo‘lishi;
– 350 ming AQSh dollari mablag‘ni depozitga joylashtirishi;
– 5 ming kv.m.dan kam bo‘lmagan ta’lim binosiga (yoki 5 yillik ijara shartnomasiga) ega bo‘lishi;
– daromadning ilk 5 yilda 80 foizini, keyingi yillarda esa kamida 50 foizini rivojlanishga yo‘naltirishi shart.
Qaror rasmiy e’lon qilingan sanadan 3 oy o‘tgach kuchga kiradi. Bu muddatgacha litsenziya olgan muassasalar esa 2026 yil 1 yanvarga qadar o‘z faoliyatini yangi talablarga moslashtirishi kerak.
