Manchesterlik musiqachilar qo‘ziqorinlardan pianino chaluvchi “ijodkorlar” yaratishdi

 

Buyuk Britaniyaning Manchester shahrida faoliyat yurituvchi Bionic and The Wires musiqa guruhi noodatiy san’at loyihasiga qo‘l urdi — ular qo‘ziqorinlarning elektr impulslarini sintezator tovushlariga aylantiruvchi maxsus tizimni yaratishdi. Bu haqda oxu.az nashri xabar berdi.

 

Loyihaning g‘oyasi shuki, qo‘ziqorinlarga o‘rnatilgan sensorlar ularning tabiiy elektr impulslarini qayd etadi. Ushbu signal maxsus ishlab chiqilgan mexanik “qo‘llar”ga uzatiladi va ular pianino yoki sintezator klavishlariga bosim o‘tkazib, musiqiy ohanglar hosil qiladi. Bu jarayon qo‘ziqorinlarning xatti-harakatlaridan musiqiy asar yaratish imkonini beradi.

 

Guruh tomonidan yaratilgan videorolik ijtimoiy tarmoqlarda keng e’tibor qozondi — uni 294 ming martadan ko‘proq tomosha qilishdi. Videoda qo‘ziqorinlar “o‘z do‘stlari” uchun sintezatorda musiqiy chiqish qilayotgani tasvirlangan.

 

San’atkorlar bu loyiha orqali “san’at faqat inson faoliyati" degan an’anaviy tushunchani rad etmoqchi bo‘lishgan. Nashrlar ta’kidlashicha, bu tajriba avvalgi tadqiqotlar, jumladan, Jon Keyjning qo‘ziqorinlarga bo‘lgan qiziqishi va 1979-yildagi “O‘simliklarning yashirin hayoti” nomli hujjatli film bilan hamohangdir.

 

Shuningdek, bu yo‘nalishda ishlayotgan boshqa san’atkorlar ham bor. Mileece ismli rassom 2000-yillarning boshidan boshlab o‘simlik va zamburug‘larning bioelektrik signalini tovushga aylantirish orqali o‘z asarlarini yaratadi. Uning ishlari hatto Tate Modern galereyasida ham namoyish etilgan.

 

Yana bir qiziqarli misol — mycolyco guruhining eksperimental trekidir. U 2020-yilda pushti istiridye qo‘ziqorinining hayot sikliga asoslangan holda yaratilgan va YouTube’da 1,6 milliondan ortiq tomosha to‘plagan. Musiqachi Tarun Nayar esa TikTok’dagi “Modern Biology” sahifasi orqali qo‘ziqorin musiqasini millionlab tomoshabinlarga yetkazmoqda.