Samarqand qog‘ozi geografik ko‘rsatkich sifatida ro‘yxatdan o‘tkazildi
Samarqandlik ustalar asrlar davomida saqlab kelayotgan qog‘oz tayyorlash san’ati rasmiy maqom oldi.
“Samarqand qog‘ozi” Adliya vazirligi tomonidan geografik ko‘rsatkich sifatida davlat ro‘yxatiga olindi. Bu huquqiy maqomga erishishda Samarqand viloyati adliya boshqarmasi hamda “Intellektual mulk markazi” davlat muassasasi muhim rol o‘ynadi.
Bugun Samarqand viloyat adliya boshqarmasi boshlig‘i o‘rinbosari Shuhrat Abduhalimov “Konigil-Meros” hunarmandchilik markazi rahbari Zarif Muxtorovga tegishli hujjatni tantanali ravishda topshirdi.
Ming yillik tarixga ega bo‘lgan Samarqand qog‘ozi noyob an’anaviy texnologiya asosida tayyorlanadi. Jarayon balxtut novdalarini suvda ivitishdan boshlanib, ularni tozalash, qaynatish va yog‘och ustki asboblarda mayin tolalarga aylantirish bilan davom etadi. So‘ng bu tolalar Siyob suvida aralashtirilib, maxsus suzg‘ichlar orqali qog‘oz shakliga keltiriladi.
Har bir qog‘oz 8–10 soat taxtakachga bostirilib, keyin silliq yuzaga yopishtiriladi va yakunda marmar tosh ustida chig‘anoq yoki aqiq toshi bilan jilolanadi. Natijada o‘ziga xos tuzilishga ega, mustahkam va chiroyli Samarqand qog‘ozi tayyor bo‘ladi.
Bu qog‘ozdan nafaqat mahalliy rassom va xattotlar, balki Yaponiyadagi qadimiy qo‘lyozmalarni restavratsiya qiluvchi mutaxassislar ham keng foydalanadi.
