Beruniy tumani hokimi o‘rinbosari 12 ming AQSH dollari bilan ushlandi
Shuningdek, DXX tomonidan Andijonda inspeksiya bo‘lim boshlig‘i va Namanganda agentlik mutaxassisi qo‘lga olingan.
Davlat xavfsizlik xizmati tomonidan o‘tkazilgan tezkor tadbirlar davomida Qoraqalpog‘iston, Namangan va Andijon viloyatlarida mansabdor shaxslar pora olayotgan va yer ajratishda suiiste’mollikka yo‘l qo‘ygan holatda qo‘lga olindi.
Qoraqalpog‘iston Respublikasi Beruniy tumani hokimining o‘rinbosari Taqiyatosh tumanida faoliyat yuritayotgan, qizilmiya ildizlarini qayta ishlovchi MChJ rahbaridan 150 gektar yer ajratish evaziga 12 ming AQSh dollari olayotgan vaqtida ushlangan.
Namangan viloyati Kosonsoy tumanidagi bog‘dorchilikka ixtisoslashgan fermer xo‘jaligi rahbari 24 gektar yer maydonini xaridor nomiga rasmiylashtirish evaziga 240 ming dollar talab qilib, oldindan 50 ming dollar olayotgan paytda qo‘lga olingan.
Uning mansabdor tanishi — Qishloq xo‘jaligi vazirligi huzuridagi Agrosanoatni rivojlantirish agentligining Kosonsoy tuman loyihalar bo‘yicha bosh mutaxassisi 10 ming dollar olayotganda qo‘lga tushgan.
Andijon viloyati, Vazirlar Mahkamasi huzuridagi Agrosanoat majmuasi ustidan nazorat qilish inspeksiyasi Andijon viloyati boshqarmasi bo‘lim boshlig‘i, fermer xo‘jaligining noqonuniy qurilmalari bo‘yicha zararni kamaytirib xulosa berish evaziga 1000 dollar olgan vaqtida ushlangan.
Hozirda barcha holatlar yuzasidan jinoyat ishlari qo‘zg‘atilib, tergov harakatlari olib borilmoqda.
