Turkiyada ofitsiant bo‘lib ishlovchi o‘zbek ayol otib o‘ldirildi
35 yoshli marhumaning jasadi O‘zbekistonga yuboriladi.
2025-yil 5-iyul kuni Turkiyaning Aydın viloyatida joylashgan ovqatlanish muassasalaridan birida ofitsiant sifatida ishlagan 35 yoshli O‘zbekiston fuqarosi ayol shaxsiy ziddiyatlar ortidan yuzaga kelgan otishma oqibatida bosh qismidan og‘ir jarohat olib, voqea joyida vafot etdi.
Hodisa yuzasidan huquqni muhofaza qiluvchi organlar tomonidan tergov ishlari olib borilmoqda. Jinoyatni sodir etganlikda gumon qilinayotgan 5 nafar shaxs qo‘lga olingan.
Vafot etgan vatandoshimizning jasadini O‘zbekistonga yuborish, shuningdek, uning yaqinlariga zarur konsullik va moddiy yordam ko‘rsatish bo‘yicha O‘zbekistonning Istanbuldagi Bosh konsulxonasi va Vazirlar Mahkamasi huzuridagi Tashqi mehnat migratsiyasi agentligining Turkiyadagi vakilligi tomonidan tegishli chora-tadbirlar ko‘rilmoqda.
O‘zbekiston Tashqi ishlar vazirligi mazkur holatni alohida nazoratga olgan.
