Poytaxtda 26 ta ko‘cha tunu-kun ishlaydigan bo’ladi
Shavkat Mirziyoyev Bunyodkor ko‘chasida yangi turizm markazlarini ko‘zdan kechirdi.
10-iyul kuni Prezident Shavkat Mirziyoyev Toshkent shahridagi qurilish ishlari, aholining turmush sharoiti va sanoat korxonalari faoliyati bilan tanishdi. Tashrif davomida u Shayxontohur va Chilonzor tumanlarini qamrab olgan yo‘nalishda bo‘ldi. Ushbu tumanlarni bog‘lab turuvchi Bunyodkor ko‘chasining 1,5 km qismi endilikda xizmat ko‘rsatish va gastroturizm ko‘chasiga aylantirildi.
Ko‘chada san’at va madaniyat maskanlari, turli idoralar, savdo nuqtalari va restoranlar faoliyat olib bormoqda. Prezident 90 ta tadbirkorlik sub’yektining faoliyati bilan tanishdi — ularning yarmi yangi tashkil etilgan. Hozirda bu hududda 500 nafar fuqaro ish bilan ta’minlangan bo‘lib, yiliga 255 ming mehmon tashrif buyurmoqda. Yaqin yillarda bu raqam 1 millionga yetkazilishi rejalashtirilmoqda.
Davlat rahbari turizm sohasida so‘nggi yillarda 2 mingdan ortiq yangi tadbirkor ish boshlaganini qayd etdi. 2024-yilda O‘zbekistonga kelgan xorijiy sayyohlar soni ilk bor 10 milliondan oshgan. Shu bois Toshkentda “gavjum ko‘chalar” konsepsiyasi rivojlantirilmoqda.
Mirzo Ulug‘bek, Olmazor, Chilonzor, Yakkasaroy, Yangi Hayot tumanlarida shunday maskanlar tashkil etilgan bo‘lib, Bunyodkor ko‘chasi bu tizimning muhim halqasiga aylanishi kutilmoqda.
Umuman, Toshkent shahrida 26 ta ko‘chani tunu-kun faoliyat yuritadigan maskanga aylantirish, 24 soat ishlaydigan savdo nuqtalarini mingtaga ko‘paytirish rejalashtirilgan.
Tashrif davomida zamonaviy avtobus bekatlari va avtoturargohlar loyihasi ham taqdim etildi. Prezident bu boradagi tashabbuslarni qo‘llab-quvvatlab, xizmat ko‘rsatish sifati va qulayliklarga e’tibor qaratish zarurligini ta’kidladi.
