Toshkentda suv quvuri dahshatli portladi
Hodisa joyiga qutqaruv ekipajlari yetib borgan. Jabrlanganlar soni haqida aniq maʼlumot yo‘q.
Bugun, 10-iyul kuni soat 11:00 larda Toshkent shahri Shayxontohur tumani, Farobiy ko‘chasida joylashgan ToshMI chorrahasi yaqinida yer ostidan o‘tuvchi diametri 800 mm bo‘lgan suv quvuri portlab ketdi.
Favqulodda vaziyatlar vazirligi bergan dastlabki ma’lumotlarga ko‘ra, quvur bosim ostida yorilgan. Hodisa oqibatida kuchli suv oqimi yuzaga kelib, chorraha hududida ko‘chalarda suv toshqiniga, ayrim binolarning oynalari sinishiga, shuningdek, avtomobillarga zarar yetishiga sabab bo‘lgan.
Mahalliy guvohlarning so‘zlariga ko‘ra, portlash kuchli ovoz bilan yuz bergan, yer ostidan toshlar otilib, avtomashinalarga jiddiy zarar yetgan. Hodisa joyiga yon-g‘in va qutqaruv brigadalari tezkor yetib kelgan.
Hozircha rasmiy manbalarda jabrlanganlar soni haqida aniq ma’lumot yo‘q, biroq ayrim norasmiy xabarlarda tan jarohati olganlar borligi aytilmoqda.
Hozirda hodisa oqibatlarini bartaraf etish ishlari olib borilmoqda. Mutasaddi tashkilotlar quvurning yorilish sabablari va yetkazilgan moddiy zarar hajmini aniqlash bo‘yicha ish olib bormoqda.
