Xitoy kompaniyasi Toshkent yo‘l infratuzilmasi uchun 300 million dollar ajratdi
Endilikda yo‘l ta’mirlash ishlari “fasaddan fasadgacha” tamoyili asosida amalga oshiriladi.
Toshkent shahrida ko‘cha-yo‘l infratuzilmasini modernizatsiya qilish bo‘yicha keng qamrovli ishlar amalga oshirilmoqda. Toshkent shahar hokimi Shavkat Umurzoqovning ma’lum qilinishicha, bu boradagi loyihalarni moliyalashtirish uchun yirik xalqaro investitsiyalar jalb etilgan.
Xususan, Xitoyning yirik qurilish kompaniyasi — China State Construction Engineering Corporation (CSCEC) tomonidan Toshkent shahar hokimligiga 300 million AQSh dollari miqdorida investitsiya ajratilgan. Ushbu mablag‘lar poytaxt yo‘llarini rekonstruksiya qilish, kapital ta’mirlash, hamda zamonaviy yo‘l o‘tkazgichlar (estakadalar) qurilishiga yo‘naltiriladi.
Hozirgi kunda loyiha doirasida Shota Rustaveli ko‘chasida qurilish-ta’mirlash ishlari boshlab yuborilgan. Umumiy rejaga ko‘ra, 200 kilometr yo‘l va 4 ta estakada quriladi va zamonaviy talablar asosida ta’mirlanadi.
Shavkat Umurzoqovning ta’kidlashicha, bundan buyon barcha qurilish ishlari “fasaddan fasadgacha” tamoyili asosida amalga oshiriladi. Ya’ni, nafaqat yo‘l qoplamasi, balki ko‘chaning ikki tomonidagi infratuzilma va bino fasadlari ham to‘liq qamrab olinadi. Bu esa Toshkent ko‘chalarini yanada tartibli, estetik jihatdan chiroyli va qulay qilishga xizmat qiladi.
Shuningdek, davlat rahbari topshirig‘iga binoan, qurilish sohasidagi normativ-huquqiy hujjatlarga o‘zgartirishlar kiritish bo‘yicha ham ishlar olib borilayotgani ta’kidlandi.
