O'zbeklar halok bo‘lgan Olmaotadagi hostel yong‘ini bo‘yicha sud hukmi e’lon qilindi
Hostelda 72 nafar odam bo‘lgan, ulardan 13 nafari halok bo‘lgan.
Olmaota shahridagi sud 2023-yil noyabr oyida yuz bergan va 13 kishining hayotiga zomin bo‘lgan hostel yong‘ini bo‘yicha sud ishini yakunladi. Sud hostel direktori Adilbek Muhamediyarov va yong‘in signalizatsiyasini o‘rnatgan kompaniya rahbari Aleksandr Pekelnikni aybdor deb topdi.
Tergov ma’lumotlariga ko‘ra, Muhamediyarov bino hujjatlari faqat do‘kon uchun mo‘ljallangan bo‘lishiga qaramay, uning birinchi qavati va yerto‘lasini noqonuniy ravishda mehmonxonaga aylantirgan. Ventilyatsiya tizimi mavjud emasligi, tor yo‘laklarga to‘shaklar joylashtirilgani yong‘in vaqtida evakuatsiyani qiyinlashtirgan. Yong‘in aynan shu joyda boshlanib, katta fojia keltirib chiqargan.
Sud qaroriga ko‘ra, Muhamediyarov yong‘in xavfsizligi qoidalarini buzganlik va ehtiyotsizlik oqibatida ikki va undan ortiq odamning o‘limiga sababchi bo‘lganlikda aybdor deb topilib, 5 yil muddatga ozodlikdan mahrum etildi.
Signalizatsiya tizimini o‘rnatgan Aleksandr Pekelnik esa sifatsiz jihozlardan foydalangani va ishlarni nazoratsiz qoldirgani uchun 4 yilga ozodlikdan mahrum qilindi. Sudda u bu ishlarning hostel uchun emas, boshqa maqsadlarda bajarilganini ta’kidladi.
Yong‘in sodir bo‘lgan vaqtda hostel ichida 72 kishi bo‘lgan. Fojia oqibatida 13 kishi — 9 qozog‘istonlik, 2 rossiyalik va 2 o‘zbekistonlik fuqaro halok bo‘ldi. Barchasi is gazidan zaharlangan.
Sud hukmiga ko‘ra, aybdorlar halok bo‘lganlarning oila a’zolariga ma’naviy zarar uchun har biriga 7 million tenge miqdorida tovon puli to‘lashi lozim.
Bu ish so‘nggi yillardagi eng ko‘p muhokama qilingan va murakkab sud jarayonlaridan biri sifatida esda qoldi.
