Xorazmda ota aliment o‘rniga farzandlariga 4 xonali kvartira berdi
Majburiy ijro byurosi ishi doirasida tomonlar o‘zaro kelishuvga erishdi.
Xorazm viloyatining Gurlan tumanida yashovchi fuqaro voyaga yetmagan ikki nafar farzandi uchun aliment pullarini oldindan to‘lash o‘rniga, o‘ziga tegishli ko‘p qavatli uyda joylashgan kvartirani bolalariga hadya qildi.
Majburiy ijro byurosining Gurlan tuman bo‘limi axborotiga ko‘ra, mazkur harakat fuqarolik ishlari bo‘yicha Shovot tumanlararo sudining buyrug‘i asosida olib borilgan ijro ishi doirasida amalga oshirilgan.
Sud qaroriga asosan, fuqarolar H. Yuldashevdan N. To‘rayeva foydasiga, ularning voyaga yetmagan ikki nafar farzandining moddiy ta’minoti uchun aliment undirish belgilangan.
Majburiy ijro byurosi tomonidan olib borilgan tushuntirish ishlari natijasida, ota alimentni pul ko‘rinishida emas, balki mulk orqali oldindan to‘lash imkoniyatidan foydalandi.
Uning tashabbusi bilan Urganch shahrida joylashgan, umumiy maydoni 73,3 kvadrat metr bo‘lgan to‘rt xonali kvartira farzandlaridan biri nomiga rasmiy notarial tartibda hujjatlashtirildi.
Bu holat ota va onaning o‘zaro roziligi asosida amalga oshirildi va qonunchilikka muvofiq tarzda rasmiylashtirildi.
