“Taqtaqoracha” dovonida 7 km uzunlikda pulli tunnel quriladi
Hozirda loyihaga 3 ta kompaniya da’vogarlik qilmoqda.
O‘zbekiston Respublikasi Transport vaziri Ilhom Mahkamovning ma’lum qilishicha, 2025-yilda Samarqand viloyatidagi Taqtaqoracha dovonida 7 kilometr uzunlikdagi pulli tunnel qurilishi bo‘yicha loyiha hujjatlari to‘liq ishlab chiqiladi va loyiha davlat-xususiy sheriklik asosida amalga oshiriladi.
Bugungi kunda mazkur tunnel loyihasini amalga oshirish istagini bildirgan 3 ta yirik kompaniya tanlov asosida ko‘rib chiqilmoqda. Loyiha bo‘yicha geodeziya va geologiya ishlari yakunlangan, texnik-iqtisodiy asos tayyorlanmoqda.
Rejaga ko‘ra, 2026-yil oxiriga qadar xususiy sherik tanlab olinib, shartnoma imzolanadi va qurilish ishlari boshlanishi kutilmoqda.
Mazkur loyiha Taqtaqoracha dovonidan o‘tuvchi hozirgi avtomobil yo‘lida transport oqimini kamaytirish, harakat xavfsizligini oshirish hamda sayohat vaqtini qisqartirishga xizmat qiladi. Tunnel pulli bo‘lishi rejalashtirilgan bo‘lib, bu loyiha xarajatlarini qoplash va uning samaradorligini ta’minlash uchun muhim hisoblanadi.
