Interpol tomonidan qidiruvga berilgan O‘zbekiston fuqarosi AQShda qo‘lga olindi
Deportatsiya qilingan fuqaro 13-iyul kuni Toshkentga olib kelindi.
Interpolning O‘zbekistondagi Milliy markaziy byurosi (MMB) qidiruvida bo‘lgan O‘zbekiston fuqarosi AQSh hududida qo‘lga olindi. Bu haqda Ichki ishlar vazirligi matbuot xizmati ma’lum qildi.
Rasmiy ma’lumotlarga ko‘ra, Interpol MMB hamda AQShdagi vakolatli organlar o‘rtasidagi samarali hamkorlik natijasida ushbu fuqaro aniqlanib, qo‘lga olingan va vatanga qaytarilgan.
Jinoyatchi O‘zbekiston Respublikasi Jinoyat kodeksining 167-moddasi 3-qismi — ya’ni ko‘p miqdorda talon-toroj qilish (o‘zlashtirish yoki rastrata) jinoyati bo‘yicha xalqaro qidiruvda bo‘lgan.
Interpol MMB AQSh huquqni muhofaza qiluvchi organlari va AQShning Toshkentdagi elchixonasi bilan axborot almashuvi va muzokaralar o‘tkazib, uning deportatsiyasini ta’minladi.
Qidiruvdagi fuqaro 2025-yil 13-iyul kuni Toshkentdagi Islom Karimov nomidagi xalqaro aeroportga olib kelingan va Interpol MMB xodimlariga topshirilgan. Ayni paytda unga nisbatan qonun doirasida choralar ko‘rilmoqda.
