Soliqqa oid nizolarni sudgacha hal qilish uchun maxsus ekspert kengashi tuziladi
Yangi tartib tadbirkorlarning vaqt va xarajatlarini tejashga xizmat qilishi kutilmoqda.
O‘zbekistonda tadbirkorlar va soliq organlari o‘rtasidagi nizolarni sudgacha hal qilish uchun yangi mexanizm joriy etilmoqda. Prezidentning 2025-yil 11-iyuldagi qaroriga ko‘ra, Savdo-sanoat palatasi huzurida Soliqqa oid nizolar bo‘yicha ekspert kengashi tashkil etiladi.
Mazkur kengash soliq, iqtisodiyot, moliya va huquq sohalaridagi malakali mutaxassislardan iborat bo‘ladi. Kengash har oyda kamida ikki marta yig‘ilish o‘tkazib, tadbirkorlarning soliq organlari qarorlaridan norozi bo‘lib qilgan murojaatlarini ko‘rib chiqadi. Biroq bu tartib jinoyat ishi doirasida yoki sudda ko‘rib chiqilayotgan nizolarga taalluqli emas.
Ekspert kengashi murojaatlar bo‘yicha xulosa chiqaradi va uni majburiy tartibda soliq, bojxona hamda boshqa tegishli davlat organlariga yuboradi. Bu haqda tadbirkorga ham ma’lumot beriladi. Yangi tizim soliqqa oid nizolarni tez va shaffof hal etishga xizmat qilishi kutilmoqda.
