Toshkentda fuqaro mashina kapotini akvariumga aylantirdi
Hozirda unga nisbatan maʼmuriy jazo tayinlangan.
Ijtimoiy tarmoqlarda Toshkentda bir haydovchi o‘z avtomobilining kapot qismiga maxsus himoya plyonkasi o‘rnatib, ichini suv bilan to‘ldirgani va unga tirik baliqlar solganligi aks etgan video tarqalmoqda. Ushbu noyob “akvarium” videosi ko‘plab odamlarning eʼtiborini tortdi, biroq bu amaliyot ekologik jihatdan to‘g‘ri emasligi sababli qoralandi.
Mazkur holat bo‘yicha Toshkent shahrining Ekologiya va Ichki ishlar vazirliklari tomonidan tezkor tekshiruv o‘tkazilgan. Tekshiruv natijasida avtomobil kapotidagi suv tirik baliqlar uchun ekologik xavf tug‘dirishi mumkinligi aniqlangan hamda bunday harakatlar jamoat tartibini buzish va atrof-muhitga zarar yetkazish deb baholangan.
Hozirda mazkur harakatlarni amalga oshirgan fuqaro maʼmuriy javobgarlikka tortilib, unga nisbatan 1 million 125 ming so‘m jarima belgilangan.
“Mutasaddilar bunday noodatiy va xavfli tajribalardan tiyilishni hamda tabiiy resurslarga zarar yetkazmaslikni tavsiya qilmoqda”, deyiladi xabarda.
