Wizz Air O‘zbekistondan Abu-Dabiga reyslarni to‘xtatadi
Toshkent va Samarqand yo‘nalishidagi reyslar ham band qilish tizimidan olib tashlandi.
Wizz Air loukoster aviakompaniyasi 2025-yil 1-sentabrdan boshlab Abu-Dabi shahridan amalga oshirayotgan barcha reyslarni bekor qilishini e’lon qildi. Bu qaror operatsion qiyinchiliklar va geosiyosiy o‘zgarishlar sababli qabul qilingan.
Reuters axborot agentligi xabariga ko‘ra, parvozlarning to‘xtatilishiga issiq iqlim sharoitida Pratt & Whitney GTF dvigatellari bilan bog‘liq uzluksiz muammolar, havo makonining yopilishi va iqtisodiy samarasizlik sabab bo‘lmoqda.
Ushbu qaror O‘zbekiston bozoriga ham ta’sir qiladi — kompaniya chiptalarni band qilish tizimidan 1-sentabrdan boshlab Toshkent–Abu-Dabi va Samarqand–Abu-Dabi reyslarini olib tashladi.
Wizz Air kelgusi faoliyatini asosan Markaziy va Sharqiy Yevropa, shuningdek, Avstriya, Italiya va Buyuk Britaniyadagi asosiy bozorlariga qaratishini ma’lum qildi.
Eslatib o‘tamiz, Wizz Air 2022-yil dekabridan Samarqand, 2023-yil yanvaridan esa Toshkent orqali Abu-Dabiga muntazam parvozlarni amalga oshira boshlagan edi.
