Bolalarni itdek akillatgan defektologga yana jinoiy ish ochildi
Uning xatti-harakatlari yuzasidan bir yil oldin ham prokuraturaga so‘rov yuborilgandi.
Ijtimoiy tarmoqlarda o‘zini go‘yoki defektolog-psixolog deb atagan Dilorom Jabborova duduqlangan bolalarni so‘kinish va qo‘rqitish usulida davolashga uringani aks etgan videoxabarlar tarqalib, keng muhokamalarga sabab bo‘lmoqda. Holat yuzasidan Bolalar ombudsmani rasmiy munosabat bildirdi.
Qayd etilishicha, bu bo‘yicha Bolalar ombudsmani 2024 yilning yakuni va 2025 yil yanvar oyida o‘rganish olib borgan va bu haqda jamoatchilikka maʼlumot bergan.
Xususan, Bolalar ombudsmanining D.J ning ish uslubiga ilmiy va kasbiy baho berish uchun kiritgan so‘rovi asosida malakali defektolog va logopedlardan iborat ishchi guruh tuzilgan. O‘tkazilgan o‘rganish natijasida pedagog D.J ning ish usuli mutlaqo ilmiy asoslanmagan, murakkab duduqlanish muammosiga tor va ibtidoiy yondashuvda ekanligi, D.J ning duduqlanishni bartaraf etishda qo‘llayotgan ruhiy va jismoniy zo‘ravonlik usullari bolalarning sog‘lig‘i va tarbiyasiga jiddiy zarar keltirishi hamda pedagogika qoidalariga butunlay zidligi to‘g‘risida xulosa berilgan. Buning asosida Bolalar ombudsmani tomonidan prokuratura organlariga holatga huquqiy baho berish to‘g‘risida so‘rov kiritilgan va D.J ga nisbatan jinoyat ishi yurituvi olib borilgan.
Maʼlum vaqt o‘tganidan so‘ng D.J avvalgidek duduqlanishi bo‘lgan bolalar bilan o‘zining ilmiy asoslanmagan, defektologiyaga daxli yo‘q amaliyotini davom ettirgani kuzatilgan.
D.J ning bola manfaatlariga zid harakatlari yuzasidan 2025 yilning 2 iyun kuni Bolalar ombudsmani Bosh prokuraturaga yana tegishli so‘rov yuborgan.
Natijada 2025 yil 25 iyun kuni Toshkent shahar Yunusobod tuman prokuraturasi tomonidan jinoyat ishini tugatish to‘g‘risidagi qaror (17.04.2025-yilda chiqarilgan) bekor qilinib, ish hujjatlari tergov harakatlarini olib borish uchun Yunusobod tuman IIO FMB huzuridagi Tergov bo‘limiga yuborilgan.
2025 yil 4 iyul kuni Tergov bo‘limi tomonidan D.J ning bola manfaatlariga zid harakatlari yuzasidan jinoyat ishi qo‘zg‘atilib, hozirda dastlabki tergov harakatlari olib borilmoqda.
