Toshkentda yuzlab odamdan uy uchun pul yig’ib olgan qurilish kompaniyasi rahbari hibsga olindi
Ijtimoiy tarmoqlarda 200 ga yaqin odam uy uchun naqd pulda to'lov qilib, aldangani aks etgan videolar tarqalgan.
Toshkent shahrida ko‘p qavatli uylar qurish va uylardan xonadonlar sotish va’dasi bilan fuqarolardan katta miqdorda pul yig‘gan shaxsga nisbatan jinoiy ish qo‘zg‘atildi. Holat bo‘yicha rasmiy tekshiruv va tergov harakatlari olib borilmoqda.
Ma’lumotlarga ko‘ra, fuqaro T.N. 2021-yilda “Strong Cities” MCHJni tashkil etgan va qonun hujjatlarida belgilangan tartibda qurilish faoliyatini yuritish uchun zarur ruxsat va litsenziyalarsiz ish boshlagan. Korxona nomidan fuqarolarga Olmazor tumanidagi yer maydonida qurilishi rejalashtirilgan ko‘p qavatli uylardan xonadonlar taklif qilingan.
Ushbu jarayonda shartnomalar rasmiylashtirilgan bo‘lsa-da, mablag‘lar maxsus bank hisobvaraqlari orqali emas, qonunchilikka zid tarzda qabul qilingan. 2023–2024-yillar davomida yig‘ilgan pullar katta miqdorga yetgan.
Hududiy qurilish nazorati organlari tomonidan o‘tkazilgan tekshiruvda obyekt bo‘yicha faqat yerga oid kadastr hujjatlari mavjudligi, qurilish va montaj ishlarini olib borish uchun zarur texnik loyihalar va ruxsatlar yo‘qligi aniqlandi. Shuningdek, inshootning seysmik xavfsizlik talablariga javob bermasligi bois qurilish ishlari to‘xtatilgan, obyekt esa o‘z ixtiyori bilan demontaj qilingan.
Hozirda holat yuzasidan Jinoyat kodeksining 168-moddasi 4-qismi “a” bandi bilan jinoyat ishi ochilib, T.N. hibsga olingan va tergov davom etmoqda.
