“Sog’lom ona bunday qilmaydi!” Senator bolalarni jang qildirgan mashhur blogerga chora ko’rishni so’radi
Bolalarning qo’liga tig’li buyumlar berib, urishga da’vat qilingan video ijtimoiy tarmoqlarda norozilik keltirib chiqargach, bloger jarimaga tortildi.
Ijtimoiy tarmoqlarda “Chechenka” taxallusi bilan tanilgan bloger kichik yoshdagi bolalarni o‘zaro urishtirayotgani tasvirlangan videoxabar tarqaldi.
Shundan so’ng holatni Senator Jamila Bobonazarova qoralab chiqdi. “Bu sog’lom onadan chiqadigan jarayon emas. Uning kuzatuvchilari asosan yosh bolali onalar ekan, bolalarning qo’liga tig’li narsalar berib, bu tarzda targ’ib qilish to’g’ri emas. Bunday kontentlarni tarmoqlarga joylashni qoralayman” deya senator Bolalar ombudsmanini “Chechenka”ni tekshirishga va vaziyatni nazoratga olishga chaqirdi.
Mazkur holat Bolalar ombudsmani tomonidan o‘rganilib, holatga huquqiy baho berish maqsadida 14-iyul kuni IIVga tegishli so‘rov berildi.
Toshkent shahri, Yakkasaroy tumani IIB tomonidan aniqlanishicha, blogerlik bilan shug‘ullanuvchi ayol A.G. (1993- yilda tug‘ilgan) 13-iyul kuni Toshkent viloyatida oilaviy dam olish vaqtida kichik yoshdagi o‘g‘li va jiyanini go‘yoki hazillashib urishtirgan va bu holat tasvirlangan videoni o‘z instagram sahifasiga joylashtirgan.
Kecha, 15-iyul kuni fuqaro G.A. bola manfaatiga zid harakatlari uchun Ma’muriy javobgarlik to‘g‘risidagi kodeksning 47-moddasi (Bolalarni tarbiyalash va ularga ta’lim berish borasidagi majburiyatini bajarmaslik) bilan javobgarlikka tortildi.
Hozirda mazkur oila mutasaddilar tomonidan alohida nazoratga olingan.
