Surxondaryolik 85 yoshli onaxon 27 yil avval xizmat vaqtida vafot etgan o‘g‘lining xotira monumentini ko‘rgani Toshkentga keldi

Poytaxtdagi “G‘alaba” bog‘ida tashkil etilgan “Millat fidoyilari” xiyobonida mustaqillik yillarida mamlakat himoyasi yo‘lida halok bo‘lgan 196 nafar harbiy xizmatchilar va huquq-tartibot idoralari xodimlari, jumladan ilk bor bojxona xodimlari xotirasiga yodgorlik o‘rnatildi. Kuni kecha ushbu majmuaga xizmat vazifasi chog‘ida halok bo‘lgan o‘g‘lining xotirasiga o‘rnatilgan monument ko‘rish uchun surxondaryolik onaxon tashrif buyurdi. 

 

 

Surxondaryolik Hayitoy momoning farzandi – bojxona xodimi Botir Davlatov bundan 27 yil muqaddam – 1998 yilning fevral oyida chegara bojxona postida xizmat olib borayotgan vaqtida xalok bo‘lgan edi. “Millat fidoyilari” majmuasiga Botir Davlatovning nomi ham zarhal harflar bilan bittilganini eshitib Surxondaryoning Sherobod tumanidan poytaxtga oshiqdi.

 

Dastlab Bojxona qo‘mitasiga tashrif buyurgan Hayitoy momo Qurbonovani Rais o‘rinbosari O.Choriyev qarshi olgan.

 

 

Onaxon qo‘mita hovlisida qahramon bojxonachilar sharafiga o‘rnatilgan moʻjaz monument qoshida o‘tganlar xotirasiga hurmat bajo keltirdi, “Bojxona tarixi” muzeyida bo‘lib, farzandi bilan bog‘liq eksponatlarni ko‘zdan kechirdi.

 

So‘ngra mehmonlar “G‘alaba” bog‘idagi “Millat fidoyilari” xiyobonida bo‘lishdi. Hayitoy momo farzandlari va nevaralari qurshovida Botir Davlatovni - tahlikali vaziyatda o‘zini o‘ylamay, burchiga sodiq qolib, xalqi uchun jonini fido qilgan bojxona xodimini yodga olishdi.

 

 

 

“Majmuaning Bojxona qo‘mitasi bag‘ishlangan qismida bojxona faoliyatining umumiy manzarasi tuyalar karvoni, turli transport vositalarida tashiladigan tashqi savdo yuklari fonidagi 4 nafar bojxona xodimi timsolida aks etadi.

 

Xodimlarning yuz ko‘rinishlari real hayotdagi prototiplarga ega. Masalan, majmuadagi kinolog bojxona xodimining yuz tuzilishi Bojxona qo‘mitasi Milliy kinologiya markazi Xizmat itlari bilan mashq o‘tkazish bo‘limining marhum xodimi Akmal O‘rinboyev qiyofasidan olingan.

 

 

 

Kasalligi bois hayotdan erta ketgan pskentlik Akmal O‘rinboyev o‘zining 10 yillik faoliyati davomida kinologlarni tayyorlash va xizmat itlarini o‘rgatishda alohida jonbozlik ko‘rsatdi.

 

Uning ota-onasi Abduvali ota va Shohidaxon aya “Millat fidoyilari” xiyoboniga kelib taskin topishadi, xayolan farzandi bilan suhbatlashishadi”, - deydi qo‘mita matbuot kotibi.