Xorazmda ekologiya inspektorlari ayovsiz do‘pposlandi
Huquqbuzarlar inspeksiya xodimlariga og‘ir tan jarohati yetkazishgach, yuk mashina bortiga ortib olishgan. Xodimlar harakatlanib ketayotgan mashinadan sakrab qochishgan.
15-iyul kuni Buxoro viloyati Ekologiya, atrof-muhitni muhofaza qilish va iqlim o‘zgarishi boshqarmasi ekologik nazorat inspeksiyasi tomonidan Peshku tumanining “Safron” cho‘l massivida navbatdagi reyd tadbiri o‘tkazildi.
Reydga boshqarmaning inspeksiya boshlig‘i J.Toshev hamda inspektorlar A.Qurbonov, B.Ro‘ziyev, J.Yadgarov, F.Murodov, N.Muhammadiyev va O.Hesenov jalb etilgan.
Tadbir davomida Xorazm viloyatidan bo‘lgan noma’lum shaxslar “ZIL” rusumli yuk mashinasiga noqonuniy ravishda kesilgan saksovul o‘simliklarini ortib, cho‘l hududidan olib chiqayotgan paytda kuzatuvga olingan. Ta’qib jarayonida yuk mashinasi A-380 avtomobil yo‘li orqali Xorazm viloyatiga kirgan.
Shundan so‘ng bosh inspektor J.Toshev kuzatuvni davom ettirgan va yo‘lning taxminan 5-kilometrida “ISUZU” yuk mashinasi tomonidan yo‘li to‘silib, avtomashinasiga zarar yetkazilgan. Avtomobildan tushgan noma’lum shaxslar sovuq qurollar bilan xodimlarga tajovuz qilgan, bosh inspektorni haqorat qilgan.
Ayni vaqtda inspektorlar N.Muhammadiyev va O.Hesenovga nisbatan og‘ir jismoniy tajovuz sodir etilib, ularning tanasiga turli darajadagi tan jarohatlari yetkazilgan. Jumladan, N.Muhammadiyevning oyog‘i singani ma’lum bo‘ldi. Jabrlanuvchilar tahdid ostida yuk mashinasiga majburan ortilgan, biroq harakat davomida o‘zlarini mashina bortidan tashlab, qochishga muvaffaq bo‘lgan.
Mazkur holat yuzasidan Xorazm viloyati Tuproqqal’a tumani prokuraturasi tomonidan tergov harakatlari olib borilmoqda.
