Farg‘onada noqonuniy diniy taʼlim berilayotgan o‘quv markaz aniqlandi
Bu yerda jami 28 nafar voyaga yetmagan bola o‘qitib kelingan.
Farg‘ona viloyatida noqonuniy diniy taʼlim bilan shug‘ullangan shaxslar ushlandi. Bu haqida DXX axborot xizmati xabar bermoqda.
Qayd etilishicha, Yozvyovon tumanining Tegirmonboshi MFYda istiqomat qiluvchi, 1991 yilda tug‘ilgan shaxs o‘z yashash manzilida professional maʼlumotga ega bo‘lmasdan 6 nafar voyaga yetmagan bolalarga diniy saboq berib kelayotgani aniqlangan. Bolalar mazkur xonadonda yashab saboq olib kelishgan.
Hujra sharoitida diniy saboq berib kelish holat Qo‘shtepa tumanida ham aniqlangan. Mumtoz mahallasida istiqomat qiluvchi, 1975 yilda tug‘ilgan fuqaro joriy yilning 30 iyun kuni o‘zining yashash manzilida hujra tashkil etgan. Erkak bu yerda voyaga yetmagan qizlarga diniy taʼlim berishni yo‘lga qo‘ygan.
Xuddi shunday holat Dang‘ara tumanida ham fosh etilib, unda Tangriqul MFYda istiqomat qiluvchi, 1963 yilda tug‘ilgan fuqaro yashash manzilida 4 nafar bolalarga joriy yilning iyun oyi boshlaridan buyon diniy saboq berib kelgan.
Tegishli ruxsatnomaga ega bo‘lmay turib, diniy saboq berish holati Farg‘ona tumani Vodil MFYda joylashgan o‘quv markazida ham aniqlandi. Mazkur o‘quv markazida diniy saboq berish mumkin bo‘lmasada, 1997 yilda tug‘ilgan shaxs 28 nafar voyaga yetmagan bolalarga diniy taʼlim berib kelgan.
Ayni paytda aniqlangan holatlar yuzasidan tegishli hujjatlar rasmiylashtirilib, qonun ustuvorligini taʼminlash maqsadida sud idoralariga yuborildi.
