IMEI kodlarini ro‘yxatdan o‘tkazish narxi oshgani rad etildi
Bojxona qo’mitasi ijtimoiy tarmoqlarda IMEI uchun to‘lov qimmatlashgani haqida tarqalgan xabarlarga oydinlik kiritdi.
So‘nggi kunlarda ijtimoiy tarmoqlarda mobil qurilmalarning IMEI-kodlarini ro‘yxatdan o‘tkazish narxlari oshib ketgani haqida xabarlar tarqaldi. Aslida esa, bu to‘lov o‘zgarmagan va bazaviy hisoblash miqdorining 20 foizini tashkil qiladi – ya’ni hozirda 75 ming so‘m. Bu haqda Bojxona qo’mitasi Raisining matbuot kotibi xabar bergan.
Shunda “ilgari 30-40 dollar edi, endi 100-400 dollarga chiqib ketdi” degan gaplar qayerdan chiqmoqda?
Bu, asosan, noqonuniy yo‘llar bilan olib kirilgan telefonlarni sotayotgan shaxslarning o‘zini oqlash harakatidir. Rasmiy yo‘l bilan import qilingan telefonlarda IMEI raqami allaqachon ro‘yxatdan o‘tkazilgan bo‘ladi.
Masalan, 2024-yilda O‘zbekistonga 1,8 million dona, qiymati 188 mln dollarlik telefon rasmiy olib kirilgan. Ammo, noqonuniy kirimlar ham bor – bojxona organlari shu yilning o‘zida 44 mingdan ortiq noqonuniy telefonni to‘xtatgan.
Agar telefon noqonuniy olib kirilgan bo‘lsa, uni ro‘yxatdan o‘tkazish uchun qurilmaning bojxona qiymatidan 30 foiz miqdorida yagona boj to‘lovi undiriladi. Shu bois ayrimlar bu to‘lovni "IMEI uchun narx oshib ketdi" deb ko‘rsatmoqda.
Noqonuniy yo‘llar bilan olib kirilgan qurilmalardan ehtiyot bo‘ling, chunki ular nafaqat IMEI muammosini tug‘diradi, balki servis xizmatlaridan ham mahrum qiladi.
