Nukusda universitet o‘qituvchisi pora bilan qo‘lga tushdi
U talabalarni yakuniy imtihondan o‘tkazish uchun pul so‘ragan.
Qoraqalpog‘iston Respublikasida talabalarni yakuniy imtihondan o‘tkazib berishini vaʼda qilgan universitet o‘qituvchisi ushlandi. Bu haqida Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.
O‘tkazilgan tezkor tadbirda Berdaq nomidagi Qoraqalpoq davlat universiteti o‘qituvchisi G.N. fuqaro A.D.ning ishonchiga kirib, yuqori lavozimda ishlovchi tanishlari orqali uni va 17 nafar talabani yakuniy imtihondan o‘tkazib berishini aytib, 18,3 mln so‘m pullarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
