Sirdayoda brigada boshlig‘i qo‘l ostida ishlovchi ayol nomiga kredit olib Hajga ketdi
Jabrlangan ayolning onasi o‘z joniga qasd qilishga uringani bois holat fosh bo‘ldi.
Sirdaryo viloyatida obodonlashtirish brigadasi rahbari o‘z qo‘l ostida ishlovchi ayol nomiga kredit rasmiylashtirib, ushbu mablag‘ hisobiga rafiqasi bilan Haj ziyoratiga ketgani aniqlandi. Bu haqda viloyat hokimi vazifasini bajaruvchi Erkinjon Turdimov 17-iyul kuni "Jasorat maktabi"da bo‘lib o‘tgan suhbat chog‘ida ma’lum qildi.
Unga ko‘ra, muammo dastlab yashirilgan, biroq suhbat davomida ayollardan biri onasining o‘z joniga qasd qilishga uringani haqida gap ochgan. Aniqlanishicha, brigada boshlig‘i xodimaning onasidan kredit rasmiylashtirishni so‘ragan, ammo qarzni o‘z vaqtida to‘lamagan. Natijada qarz miqdori ortib borgan, ammo olingan mablag‘ evaziga rahbar Haj safariga chiqqan.
Holat ochilgach, ayol kreditni o‘zi to‘lashga majbur bo‘lgan. Viloyat rahbari bu masalani shaxsan ko‘rib chiqib, jabrlanuvchi ayol va mas’ullarni suhbatga chaqirganini ma’lum qildi. Brigada rahbari esa dastlab kelmagan, ammo keyinchalik yuzini ko‘rsatib, qarzdorlikni qoplagan.
“Bu xalqning qanday sabrli va bag‘rikengligini ko‘rsatadi”, — dedi Turdimov.
