Telegram’da qizga yozgan xabari sabab erkak 5 sutkaga qamaldi va jarimaga tortildi
Erkakning ayolga yozgan bezorilik mazmunidagi xabari va uning ma’lumotlarini tarqatishi sud qarori bilan ma’muriy javobgarlikka sabab bo‘ldi.
Buxoro viloyatining Jondor tumanida yashovchi fuqaro N.M. Telegram orqali ayol kishiga tanishish maqsadida yozgan xabari hamda uning shaxsiy ma’lumotlarini tarqatgani uchun ma’muriy javobgarlikka tortildi.
Tuman sudida ko‘rib chiqilgan holatga ko‘ra, N.M. joriy yilning iyun oyida fuqaro G.A.ga tegishli shaxsiy ma’lumotlarni ruxsatsiz tarqatgan. Shuningdek, 8-iyul kuni soat 18:44 da Telegram orqali G.A.ga tanishishni taklif qilib, tinchligini buzgan va jamoat tartib-qoidalariga zid harakat qilgan.
Ushbu harakatlar yuzasidan rasmiy bayonnoma tuzilgan va u MJtKning 183-moddasi (mayda bezorilik)dan 41-1-moddasi (ayollarning sha'ni va qadr-qimmatini tahqirlash)ga qayta malakalanib, MJtKning 411 va 46-2-moddalari bilan aybdor deb topildi.
Sud qaroriga ko‘ra, N.M.ga 5 sutka ma’muriy qamoq jazosi va eng kam oylik ish haqining 7 baravari miqdorida — 2 million 625 ming so‘m jarima belgilandi.
