Tojikiston va O‘zbekiston Rog‘un GES elektr energiyasi bo‘yicha 20 yilga shartnoma tuzdi
O‘zbekiston Rog‘un GESdan har kilovatt-soatini 3,4 sentdan sotib oladi.
Tojikiston hukumati O‘zbekiston bilan Rog‘un GES elektr energiyasini yetkazib berish bo‘yicha hamkorlik bitimini imzolashga rozilik berdi. Bitim doirasida dastlabki kelishuvga ko‘ra, Rog‘un GESdan O‘zbekistonga har kilovatt-soat elektr energiyasi 3,4 AQSh sentidan yetkazib beriladi. Narx har yili 1 foizga indeksatsiya qilinadi. Bu haqda Asia plus nashri xabar bergan.
Elektr energiyasi yetkazib berish bo‘yicha yakuniy shartlar “Rog‘un GES” va O‘zbekistonning “Uzenergosotish” kompaniyalari o‘rtasidagi alohida shartnomada belgilanadi. Bu shartnoma 20 yilga mo‘ljallangan va har 10 yilda avtomatik ravishda uzaytirilishi mumkin.
Rog‘un elektr energiyasi O‘zbekiston energetika tizimidagi quvvat tanqisligi yuzaga keladigan vaqtlarda, ya’ni asosan yozgi mavsumda yetkazib beriladi. Bu yetkazib berishlar “Barki Tochik” kompaniyasining mavjud eksportlari bilan parallel tarzda amalga oshiriladi.
Hozircha Rog‘un GES to‘liq quvvatda ishlamayotgan bo‘lsa-da, kelgusida stansiya ishga to‘liq tushgach, elektr energiyasi yil davomida muntazam eksport qilinishi rejalashtirilgan.
